काठमाडौँ, जेठ ३१ गते । सामान्य भन्दा दुई दिन ढिला गरी नेपालमा मनसुन प्रवेश गरेको छ । जल तथा मौसम पूर्वानुमान महाशाखाका अनुसार पूर्वबाट शुक्रबार मनसुन नेपाल प्रवेश गरेको हो ।
मनसुन प्रवेश गरेसँगै मौसमी गतिविधि बढ्ने सम्भावना रहेको मौसमविदले बताएका छन् । तत्कालका लागि मनसुनी गतिविधि त्यति सक्रिय छैन ।
तर न्यून चापीय क्षेत्रको प्रभाव बलियो रहेकाले एक–दुई दिनमा मनसुनी गतिविधि सक्रिय हुने देखिएको मौसमविदको भनाई छ ।
सोही भएर आवश्यक सतर्कता अपनाउन र मनसुनलाई मध्यनजर गर्दै आवश्यक पूर्वतयारीमा लाग्न मौसमविदको सुझाव रहेको छ ।
अहिले नेपालमा स्थानीय वायु, पश्चिमी वायु ,पश्चिम भू–भाग नजिक रहेको न्यून चापीय क्षेत्र साथै पूर्व–पश्चिम बनेको न्यून चापीय रेखा र बंगालको खाडीमा रहेको निम्न चापीय प्रणालीको प्रभाव रहेको छ ।
अहिले देशभर आंशिकदेखि सामान्य बदली भएको छ।
शनिबार दिउँसो देशभर सामान्य बदली रही प्रदेश १, बागमती प्रदेश, गण्डकी प्रदेश, कर्णाली प्रदेश र सुदूरपश्चिम प्रदेशका केही स्थान र बाँकी प्रदेशका थोरै स्थानमा मेघगर्जन र चट्याङ्गसहित हल्कादेखि मध्यम वर्षाको संभावना रहेको महाशाखाले जनाएको छ ।
यस्तै राति पनि देशभर सामान्य बदली रहने छ ।
प्रदेश १, प्रदेश २, बागमती प्रदेश, गण्डकी प्रदेश, प्रदेश ५ का केही स्थानमा र बाँकी प्रदेशका थोरै स्थानमा मेघगर्जन र चट्याङ्ग सहित वर्षाको संभावना रहेको मौसमविदले बताएका छन् ।
