काठमाडौं । काठमाडौंमा कोरोना संक्रमितको संख्या बढेसँगै सिंहदरबार प्रवेशमा थप कडाइ गरिएको छ ।
कोरोनाका संक्रमित बढ्दै गएपछि जोखिम बढेको भन्दै आजदेखि देशको प्रमुख प्रशासनिक केन्द्र सिंहदरबार प्रवेशमा कडाइ गरिएको हो ।
अत्यावश्यक बाहेकका सर्वसाधारणको प्रवेशमा कडाइ गरिएको सरकारले जनाएको छ । त्यसका लागि अस्थायी पास बन्द गरिएको सिंहदरबार गण प्रहरीले जनाएको छ ।
सिंहदरबारभित्र कार्यरत कर्मचारी, अत्यवाश्यक काम लिएर पुग्ने व्यक्ति, प्रेस पास लिएका पत्रकारलाई मात्रै प्रवेश दिइएको जनाइएको छ ।
संक्रमणको जोखिम बढ्दै गएपछि सिंहदरबारमा चाप कम गर्न यस्तो निर्णय गरिएको सरकारको भनाइ छ । सिंहदरबारस्थित प्रहरीको मेसमा कोरोना संक्रमित फेला परेकाले सर्वसाधारणमा कडाइ गरिएको स्रोतले जनाएको छ।
