काठमाडौं । नेपालको झण्डा जलाएको दृश्य समावेश गरेर म्युजिक भिडियो बनाउने ९ जनालाई प्रहरीले पक्राउ गरेको छ ।
प्रहरीको केन्द्रीय अनुसन्धान व्यूरो र महानगरीय अपराध महाशाखाको टोलीले हालसम्म ९ जनालाई पक्राउ गरेको नेपाल प्रहरीका प्रवक्ता कुबेर कडायतले बताउनुभयो ।
प्रवक्ता कडायतका अनुसार पक्राउ पर्नेमा गीत गाउने ग्लाल्जेन दोर्जे तामाङसहित क्यामेरापर्सन, भिडियो सम्पादक र मोडल छन् ।
मंगोलियक हप नेपाल नामक युट्युक च्यानलमा राखिएको देशद्रोही नामको गीतको भिडियोमा नेपालको राष्ट्रिय झण्डा जलाइएको छ भने जातिय सद्भाव खलबलाउने शब्दहरु प्रयोग गरिएका छन् ।
भदौ १ गते युट्युबमा अपलोड गरिएको यो भिडियो सामाजिक सञ्जालमा भाइरल भएलगत्तै प्रहरीले संलग्नहरुको खोजी सुरु गरेको थियो ।
म्युजिक भिडियोको सुटिङ मकवानपुरको बाग्मती गाउँपालिकास्थित श्री विष्णु आधारभूत विद्यालयको प्रांगणमा गरिएको प्रहरीले जनाएको छ ।
म्युजिक भिडियोमा प्रधानमन्त्री केपी शर्मा ओलीसहित पृथ्वीनारायण शाह, पूर्व प्रधानमन्त्री वीपी कोइराला, गिरिजाप्रसाद कोइराला, पुष्पकमल दाहाल प्रचण्ड, शेरबहादुर देउवा र पूर्व राजा ज्ञानेन्द्र शाहको तस्विर पनि जलाइएको छ ।
पक्राउ परेकाहरुलाई प्रहरीले साइबर क्राइम र मुलुकी अपराध संहिता २०७४ को दफा १५१ को उपदफा १ अनुसार मुद्दा चलाउने तयारी गरेको छ ।
झन्डा जलाउन, राष्ट्रिय गान दुरुपयोग, सामाजिक जातीय, धार्मिक द्वेष फैलाउन पाइँदैन । यो कसुर गरे ३ वर्ष कैद वा ३० हजार जरिवाना वा दुवै सजाय हुने व्यवस्था छ ।
यो पनि,
एक जना संसदमा कोरोना संक्रमण पुष्टि भएको छ ।
संघीय संसद सदस्य यज्ञबहादुर बोगटीलाई कोरोना संक्रमण पुष्टि भएको हो । अछाम २ मा नेकपाबाट निर्वाचित बोगटीले आफूलाई कोरोना संक्रमण भएको बताए ।
आफ्नो टोलमा एक जनालाई कोरोना संक्रमण पुष्टि भएपछि स्वाब संकलन गरिएको थियो ।
ललितपुरमा बस्ने उनी साउन ३० गते शुक्रराज ट्रपिकल तथा सरुवा रोग अस्पताल टेकुमा स्वाबको नमुना दिएका थिए । त्यसको पहिलो रिपोर्ट साउन ३२ गते आएको थियो, त्यतिबेला रिपोर्ट नेगेटिभ आएको थियो, तर भदौ २ गते अर्को रिपोर्ट आउँदा पोजेटिभ आएको बोगटीले बताए ।
कोरोना भाइरस भएको पुष्टि भएपछि उनी कीर्तिपुरस्थित आयुर्वेद अस्पतालको आइसोलेसनमा छन् ।
बोगटी साउन १७ गते अछामबाट फर्किएका थिए । उनका अनुसार साउन २५ गतेसम्म सिंहदरबारमा संसदीय समितिको बैठकहरुमा गइरहेका थिए ।
यसअघि पनि केही संघीय सांसद र प्रदेशका सांसदलाई कोरोना पुष्टि भइसकेको छ ।
